News Details
23/12/2024
کرم میں جاری صورتحال کی وجہ سے لوگوں کو آمدورفت میں درپیش مشکلات کے حل کے لئے وزیر اعلی خیبرپختونخوا علی امین گنڈاپور کی ہدایت پر ہیلی کاپٹر سروس کا آغاز کیا گیا ہے
کرم میں جاری صورتحال کی وجہ سے لوگوں کو آمدورفت میں درپیش مشکلات کے حل کے لئے وزیر اعلی خیبرپختونخوا علی امین گنڈاپور کی ہدایت پر ہیلی کاپٹر سروس کا آغاز کیا گیا ہے جبکہ علاقے میں ادویات کی کمی پوری کرنے کے لئے صوبائی حکومت کے ہیلی کاپٹر کے ذریعے ادویات کی فراہمی کا سلسلہ پہلے ہی سے جاری تھا۔ تفصیلات کے مطابق صوبائی حکومت کے ہیلی کاپٹر کے ذریعے اتوار کے روز مجموعی طور پر 147 افراد کو ائیر ٹرانسپورٹ فراہم کیا گیا۔ ان افراد میں جرگہ ممبران کے علاوہ مریض، طلبہ، سرکاری عملہ اور دیگر افراد شامل تھے۔ اتوار کے روز ہیلی کاپٹر کی پہلی پرواز کے ذریعے پشاور سے 15 افراد کو پاراچنار منتقل کیا گیا جن میں جرگہ ممبران اور سرکاری عملے کے افراد شامل تھے۔ ہیلی کاپٹر نے اتوار کے روز پاراچنار سے ٹل تک تین پروازیں کی جن میں 87 افراد کو ٹل منتقل کیا گیا۔اسی طرح ٹل سے 15 افراد کو بھی پاراچنار منتقل کیا گیا۔ اتوار کے روز کی آخری پرواز کے ذریعے پاراچنار سے 30 افراد کو پشاور منتقل کیا گیا۔ اسی طرح ہفتے کے روز پاراچنار سے 53 افراد کو پشاور منتقل کیا گیا تھا۔ گزشتہ دو دنوں میں صوبائی حکومت کے ہیلی کاپٹر کے ذریعے مجموعی طور پر 200 افراد کو ائیر لفٹ کیا گیا۔ علاقے میں ادویات کی کمی پوری کرنے کے لئے وزیر اعلی کی ہدایت پر اب تک ہیلی کاپٹر کی سات پروازوں کے ذریعے ادویات کرم بھیجی گئی ہیں اور مجموعی طور چھ کروڑ روپے مالیت سے زائد کی ادویات کرم پہنچائی جاچکی ہیں۔ اس سلسلے میں اپنے ایک بیان میں وزیر اعلی نے کہا ہے کہ ضلع کرم کے زمینی راستے کی بندش کی وجہ سے وہاں کے لوگوں کو درپیش مشکلات کا صوبائی حکومت کو بھر پور احساس ہے اور صوبائی حکومت ان مشکلات کو دور کرنے کے لئے تمام دستیاب وسائل بروئے کار لا رہی ہے۔ انہوں نے مزید کہا کہ صوبائی حکومت کرم کے مسئلے کا پائیدار نکالنے اور وہاں کے لوگوں کے مسائل کو مستقل بنیادوں پر حل کرنے کے لئے سنجیدہ کوششیںکر رہی ہے۔
<><><><><><><>