News Details

17/01/2026

وزیر اعلیٰ خیبر پختونخوا محمد سہیل آفریدی نے تیراہ متاثرین سے ملاقات کے لیے وادی تیراہ کا دورہ کیا اور متاثرین کو درپیش مسائل سنے اور انکے فوری حل کے لیے احکامات جاری کیے۔

وزیر اعلیٰ خیبر پختونخوا محمد سہیل آفریدی نے تیراہ متاثرین سے ملاقات کے لیے وادی تیراہ کا دورہ کیا اور متاثرین کو درپیش مسائل سنے اور انکے فوری حل کے لیے احکامات جاری کیے۔ انہوں نے متاثرین سے خطاب کرتے ہوئے کہا کہ تیراہ کے عوام کے ساتھ جو ہو رہا ہے وہ ناقابل قبول ہے۔ بار بار ناکامی کے باوجود بند کمروں کے فیصلوں سے باز نہیں آیا جا رہا۔ مجموعی طور پر 22 بڑے اور 14 ہزار چھوٹے آپریشنز کے بعد اب کیا ضمانت ہے کہ امن قائم ہو سکے گا؟وزیر اعلیٰ نے مزید کہا کہ ناکام پالیسی کی تبدیلی کا مطالبہ کریں تو دہشتگردوں کا حامی کہا جاتا ہے اور اگر مشاورت کی بات کریں تو الزام لگایا جاتا ہے کہ سمگلروں سے تعلق ہے۔ انہوں نے مزید کہا کہ ان پالیسیوں کی مخالفت کی وجہ سے مجھے اور میری قوم کو نشانہ بنایا جا رہا ہے۔ انہیں معلوم ہے کہ میرے سینے میں اپنے عوام کے لیے درد ہے، اسی لیے میری سرزمین کو نشانہ بنایا جا رہا ہے۔ میری حکومت نے پہلے دن سے امن کے لیے آواز بلند کی۔ ہم کل بھی آپریشن کے خلاف تھے، آج بھی ہیں اور آئندہ بھی اس ناکام پالیسی کا حصہ نہیں بنیں گے کیونکہ مستقل اور پائیدار امن کے لیے تمام اسٹیک ہولڈرز کی مشاورت سے متفقہ پالیسی ہی واحد حل ہے۔ انہوں نے متاثرین سے خطاب کرتے ہوئے کہا کہ میں آپ میں سے ہوں اور مرتے دم تک پہاڑ کی طرح آپ کے ساتھ کھڑا رہوں گا۔ زور زبردستی اور بدمعاشی کے ذریعے آپریشن شروع کیا گیا اور آپریشن کا اعلان کر کے عوام کو دکھ اور تکلیف میں جھونک کر بے سہارا چھوڑ دیا گیا۔ سہیل آفریدی کا کہنا تھا کہ متاثرہ عوام کا تحفظ اور عزت اب میری براہ راست ذمہ داری ہے،تیراہ متاثرین کے مسائل میں کسی بھی قسم کی غفلت ناقابل برداشت ہوگی۔ محمد سہیل آفریدی نے تیراہ متاثرین کی مشکلات فوری کم کرنے کے لیے تمام متعلقہ محکموں کو ہنگامی اقدامات کا حکم جاری کیا اور متعلقہ انتظامیہ کو تنبیہ کی کہ جگہ جگہ لوگوں کو روکنے اور قطاروں میں تذلیل کروانے کو کسی صورت برداشت نہیں کیا جائے گا۔ انہوں نے رجسٹریشن کا عمل تیز کرنے کے لیے نادرا کے مزید دفاتر ہنگامی بنیادوں پر قائم کرنے کی ہدایت کی اور کہا کہ میرا عوام سے وعدہ ہے کہ ہم بندوق کو قلم سے بدلیں گے۔