News Details

25/07/2025

وزیر اعلی خیبر پختونخوا علی امین خان گنڈاپور کی میزبانی میں وزیر اعلیٰ ہاوس پشاور میں آل پارٹیز کانفرنس کا انعقاد کیا گیا

وزیر اعلی خیبر پختونخوا علی امین خان گنڈاپور کی میزبانی میں وزیر اعلیٰ ہاوس پشاور میں آل پارٹیز کانفرنس کا انعقاد کیا گیا۔صوبائی کابینہ اراکین اور ممبران صوبائی اسمبلی کے علاوہ مختلف سیاسی جماعتوں کے نمائندوں نے کانفرنس میں شرکت کی۔کانفرنس میں شریک سیاسی جماعتوں میں جماعت اسلامی، جمیعت علمائے اسلام (س)، پاکستان مسلم لیگ(ن)، پاکستان تحریک انصاف، قومی وطن پارٹی اور پاکستان تحریک انصاف پارلیمنٹیرینز شامل ہیں۔ سابق گورنرز خیبر پختونخوا انجینئر شوکت اللہ اور شاہ فرمان بھی کانفرنس میں شریک تھے۔ ان کیمرہ سیشن میں شرکاءکو صوبے میں امن و امان کی موجودہ صورتحال، امن و امان کے لئے صوبائی حکومت کی کوششوں اور اقدامات پر بریفنگ بھی دی گئی۔ کانفرنس کے اختتام پر درجہ ذیل نکات پر مشتمل مشرکہ لائحہ عمل پیش کیا گیا۔ شہداءاور ان کے اہل خانہ کے ساتھ گہرے رنج و غم اور مکمل یکجہتی کا اظہار، صوبے میں دیرپا امن کی بحالی کے لیے فوری طور پر جامع اور مربوط اقدامات کیے جائیں، خوارج کے خاتمے کے لیے خفیہ معلومات کی بنیاد پر ہدفی کارروائیاں (انٹیلی جنس بیسڈ کاروائی )عمل میں لائی جائیں۔ دیرپا امن کی کاوش اور دہشت گردوں کے خاتمے کے لئے تمام سیاسی جماعتیں ، مشران، عوام ، حکومت خیبر پختونخوا ، انتظامیہ اور قانون نافذ کرنے والے ادارے بلاتفریق بھر پور کاروائی کا اعادہ کرتے ہیں۔ صوبے کو عسکریت پسندی کے چنگل سے نجات دلائی جائے گی اور امن بحال کیا جائے گا، جو علاقے میں خوشحالی اور پائیدار ترقی کے ایک نئے دور کا آغاز ثابت ہوگا۔ اِس سلسلے میں تمام سیاسی جماعتیں اور عوامی نمائندے ضلعی سطح پر انتظامیہ اور قانون نافذ کرنے والے اداروں کے ساتھ مسلسل اور بھر پور تعاون کا اعادہ کریں۔