News Details
24/07/2025
وزیر اعلیٰ خیبر پختونخوا علی امین خان گنڈاپور نے بدھ کے روز پی ڈی ایم اے کے ایمرجنسی آپریشن سنٹر کا دورہ کیا
وزیر اعلیٰ خیبر پختونخوا علی امین خان گنڈاپور نے بدھ کے روز پی ڈی ایم اے کے ایمرجنسی آپریشن سنٹر کا دورہ کیا اور موجودہ سیلابی صورتحال میں پی ڈی ایم اے کی تیاریوں کا جائزہ لیا۔ چیف سیکرٹری خیبر پختونخوا اور دیگر اعلی حکام بھی موقع پر موجود تھے۔ پی ڈی ایم اے حکام کی طرف سے وزیر اعلیٰ کو صوبہ بھر کے دریاو ¿ں کی تازہ صورتحال، مون سون بارشوں سے ہونے والے نقصانات، ارلی وارننگ سسٹم، کسی بھی ناخوشگوار صورتحال سے نمٹنے کے لئے انتظامات اور دیگر متعدد اُمور پر بریفنگ دی گئی۔ اس موقع پر بتایا گیا کہ کسی بھی ہنگامی صورتحال میں بروقت رسپانس کے لئے پی ڈی ایم اے ہیلپ لائن ہمہ وقت کام کر رہی ہے، ہنگامی صورتحال سے نمٹنے کے لئے اضلاع کی سطح پر تمام اداروں اور محکموں کے درمیان کوآرڈینیشن کا مربوط نظام فعال ہے۔ دریاو ¿ں میں پانی کے اخراج کی صورتحال کی مسلسل نگرانی کی جا رہی ہے اور سیلابی صورتحال کی صورت میں ارلی وارننگ سسٹم کے ذریعے متعلقہ ضلعی انتظامیہ کو بروقت اطلاع دی جاتی ہے۔ حکام نے مزید بتایا کہ تمام اضلاع میں ریسکیو سامان اور آلات کی دستیابی یقینی بنائی گئی ہے، اس وقت صوبے میں دو سڑکوں کے علاوہ باقی تمام بند سڑکیں کھول دی گئی ہیں۔ اس موقع پر بتایا گیا کہ صوبہ بھر میں مون سون بارشوں کی وجہ سے مختلف حادثات میں اب تک 60 اموات ہوئی ہیں، ان حادثات میں 35 گھروں کو مکمل اور 212 گھروں کو جزوی نقصان پہنچا ہے۔ ان تمام نقصانات کے معاوضوں کی رقوم متعلقہ ڈپٹی کمشنرز کو جاری کی گءہیں۔ وزیر اعلیٰ نے اس موقع پر متعلقہ حکام کو ہدایت کی کہ تمام اضلاع سے بارشوں اور سیلاب سے ہونے والے نقصانات کی تازہ ترین رپورٹ حاصل کی جائے، جن متاثرین کو تاحال معاوضوں کی ادائیگی نہیں ہوئی انہیں فوری معاوضے ادا کئے جائیں۔ علی امین گنڈاپور نے دریاوں میں سیلاب کی صورتحال پر کڑی نظر رکنے جبکہ مون سون بارشوں کے فوری بعد دریاوں اور نہروں کے کنارے تجاوزات کو ہٹانے کے لئے اقدامات اٹھانے کی ہدایت کی ہے۔ انہوں نے دریاوں اور نہروں کے پانی کے بہاو میں حائل دیگر رکاوٹوں کو ہٹانے کے لئے بھی اقدامات کی ہدایت کی ہے۔ وزیر اعلیٰ نے مذید ہدایت کی کہ دور افتادہ تحصیلوں میں ریسکیو کے سب اسٹیشنز کے قیام کے لئے کیس تیار کیا جائے، اسی طرح پی ڈی ایم اے کے ایمرجنسی آپریشن سنٹر کو اپگریڈ کرنے اور اس کے لئے جدید آلات کی خریداری کے لئے ہوم ورک مکمل کیا جائے۔ علی امین گنڈاپور نے محکمہ آبپاشی کے ارلی وارننگ سسٹم کو بھی اپگریڈ کرنے کے لئے اقدامات اٹھانے کی ہدایت کی اور کہا کہ صوبائی حکومت اس مقصد کے لئے تمام درکار مالی وسائل فوری طور پر فراہم کرے گی۔