News Details
19/03/2025
وزیر اعلیٰ خیبر پختونخوا علی امین خان گنڈاپور نے صوبے میں پولیس کو مستحکم اور مضبوط بنانے کے سلسلے میں ایک اہم اقدام کے طور پر پولیس کی مختلف ضروریات پوری کرنے کے لئے فوری طور پر ساڑھے پانچ ارب روپے جاری کرنے احکامات جاری کئے ہیں۔
وزیر اعلیٰ خیبر پختونخوا علی امین خان گنڈاپور نے صوبے میں پولیس کو مستحکم اور مضبوط بنانے کے سلسلے میں ایک اہم اقدام کے طور پر پولیس کی مختلف ضروریات پوری کرنے کے لئے فوری طور پر ساڑھے پانچ ارب روپے جاری کرنے احکامات جاری کئے ہیں۔ یہ فیصلہ انہوں نے گذشتہ روز پولیس سے متعلق ایک اہم اجلاس کی صدارت کرتے ہوئے کیا۔ چیف سیکرٹری شہاب علی شاہ، انسپکٹر جنرل آف پولیس ذوالفقار حمید، ایڈیشنل چیف سیکرٹری داخلہ محمد عابد مجید کے علاوہ محکمہ خزانہ اور پولیس کے اعلیٰ حکام بھی اجلاس میں شریک ہوئے۔ تفصیلات کے مطابق اجلاس میں پولیس گاڑیوں کی بلٹ پروفنگ اور دیگر جدید آلات کی خریداری کے لئے تین ارب روپے فوری جاری کرنے کا فیصلہ کیا گیا ہے۔ اسی طرح ہر ضلع کی سطح پر جدید آلات سے لیس اسپیشل ویپن اینڈ ٹیکنیک ٹیمیں بنانے جبکہ پولیس تھانوں اور چیک پوسٹوں کو محفوظ بنانے کے لئے 1.3 ارب روپے فراہم کرنے کا بھی فیصلہ کیا گیا یے۔ ا سکے علاو ¿ہ سالانہ ترقیاتی پروگرام میں شامل تھانوں اور چیک پوسٹوں کی تعمیر کے باقی ماندہ منصوبوں کے لئے 500 ملین روپے، پولیس کے لئے نائٹ ویژن گوگلز، سنائپرز اور دیگر آلات کے لئے 720 ملین روپے بھی جاری کرنے کا فیصلہ ہوا ہے۔ وزیر اعلیٰ نے پولیس افسران کی تنخواہیں بلوچستان پولیس افسران کی تنخواہوں کے برابر اور پولیس اہلکاروں کی تنخواہیں پنجاب پولیس اہلکاروں کی تنخواہوں کے برابر کرنے کا بھی اصولی فیصلہ کیا ہے۔ اجلاس کو بریفنگ دیتے ہوئے بتایا گیا کہ بلوچستان میں پولیس افسران کی تنخواہیں دیگر تمام صوبوں جبکہ پنجاب میں پولیس اہلکاروں کی تنخواہیں دیگر تمام صوبوں سے زیادہ ہیں۔ اجلاس میں اظہار خیال کرتے ہوئے وزیر اعلی نے کہا کہ امن و امان کا قیام موجودہ صوبائی حکومت کی سب سے اہم ترجیح ہے، صوبے میں امن و امان کی موجودہ صورتحال کے پیش نظر پولیس کو ہر لحاظ سے مستحکم کرنے کی اشد ضرورت ہے۔ موجودہ صوبائی حکومت شروع دن ہی سے پولیس کو مستحکم بنانے کے لئے خطیر وسائل خرچ کر رہی ہے، پولیس کی ضروریات کو پورا کرنے کے لئے ترجیحی بنیادوں پر فنڈز فراہم کئے جائیں گے۔ انہوں نے مزید کہا کہ پولیس کو سکیورٹی کے موجودہ چیلنجز سے نمٹنے کے قابل بنانا ہمارے لئے سب سے مقدم ہے، اس پر کوئی سمجھوتہ نہیں کیا جائے گا،خیبر پختونخوا پولیس انتہائی جوانمردی سے دہشتگردی کا مقابلہ کر رہی ہے اور ہمیں پولیس کی کارکردگی اور پولیس جوانوں کی قربانیوں پر فخر ہے۔ وزیر اعلیٰ نے واضح کیا کہ صوبائی حکومت پولیس کی ضرورت پوری کرنے میں وسائل کی کمی کو رکاوٹ نہیں بننے دے گی۔
<><><><><><>