News Details
16/03/2025
خیبر پختونخوا حکومت نے پبلک پروکیورمنٹ کے عمل کو شفاف اور محفوظ بنانے کے لیے ایک اہم اقدام کے طور پر صوبے میں آٹومیٹڈ اینڈ انٹیگریٹڈ الیکٹرانک پلیٹ فارم " ای- پاک ایکوزیشن اینڈ ڈسپوزل سسٹم " متعارف کروا دیا ہے۔
خیبر پختونخوا حکومت نے پبلک پروکیورمنٹ کے عمل کو شفاف اور محفوظ بنانے کے لیے ایک اہم اقدام کے طور پر صوبے میں آٹومیٹڈ اینڈ انٹیگریٹڈ الیکٹرانک پلیٹ فارم " ای- پاک ایکوزیشن اینڈ ڈسپوزل سسٹم " متعارف کروا دیا ہے۔ وزیر اعلیٰ خیبر پختونخوا علی امین خان گنڈاپور نے ای ایکوزیشن اینڈ ڈسپوزل سسٹم کا باضابطہ اجراءکر دیا۔ یہ سسٹم وفاقی پبلک پروکیورمنٹ ریگولیٹری اتھارٹی اور ورلڈ بینک کے تعاون سے تیار کیا گیا ہے۔ ابتدائی طور پر ای ایکوزیشن اینڈ ڈسپوزل سسٹم کو آٹھ صوبائی محکموں میں پائلٹ کیا گیا ہے جبکہ اگلے مرحلے میں اس سسٹم کو باقی ماندہ محکموں تک توسیع دی جائے گی۔ وزیر اعلیٰ کی یکم جولائی2025 سے تمام صوبائی محکموں میں پروکیورمنٹ نئے سسٹم کے تحت یقینی بنانے کی ہدایت کی ہے۔ ابتدائی آٹھ محکموں میں آبنوشی، آبپاشی ، مواصلات و تعمیرات ، بلدیات ، صحت ، سائنس ٹیکنالوجی اینڈ انفارمیشن ٹیکنالوجی ، کے پی آئی ٹی بورڈ، کے پی ازمک، شامل ہیں۔ متعلقہ حکام نے وزیراعلیٰ کو بریفنگ دیتے ہوئے بتایا کہ ای پاک ایکوزیشن اینڈ ڈسپوزل سسٹم کے ذریعے پبلک پروکیورمنٹ شفاف اور محفوظ طریقے سے ہوگی اور پروکیورمنٹ کے عمل میں انسانی مداخلت اور غلطیوں کی گنجائش کم سے کم ہوگی۔ مزید بتایا گیا کہ نئے سسٹم کے تحت پبلک فنڈز کے استعمال میں شفافیت یقینی ہوگی، محکموں کی کارکردگی اور سروس ڈیلیوری بہتر ہوگی اور تمام سرکاری محکموں میں پروکیورمنٹ کا یکساں نظام رائج ہوگا۔ حکام نے بتایا کہ صوبائی حکومت کے پروکیورمنٹ کے تمام امور ایک ہی پیلٹ فارم پر ہونگی، اس خود کار سسٹم کے ذریعے پروکیورمنٹ کے پیچیدہ عمل کو آسان جبکہ ٹائم لائنز کو مختصر بنایا گیا ہے، نئے پروکیورمنٹ سسٹم کے تحت تمام سرگرمیوں کی مانیٹرنگ اور فیصلہ سازی کے لیے متعلقہ دفاتر میں ڈیش بورڈز قائم ہونگے۔ اس موقع پر گفتگو کرتے ہوئے وزیر اعلی نے کہا کہ ای-پاک ایکوزیشن اینڈ ڈسپوزل سسٹم کا اجراءوقت کی اشد ضرورت ہے اور اس سسٹم کے اجراءسے شفافیت کے ساتھ ساتھ وقت اور وسائل دونوں کی بچت ہوگی۔ انہوں نے مزید کہا کہ صوبائی حکومت سرکاری امور میں شفافیت کو یقینی بنانے اور انسانی مداخلت کو کم کرنے کے لیے تمام محکموں میں ڈیجیٹائزیشن کی طرف جا رہی ہے جسے محکموں کی استعداد کار اور سروس ڈیلیوری بہتر ہو رہی ہے۔ انہوں نے ہدایت کی کہ صوبائی حکومت کے تمام محکموں میں نئے پروکیورمنٹ سسٹم پر عملدرآمد یقینی بنایا جائے۔
<><><><><><>