News Details
17/06/2020
وزیراعلیٰ محمود خان سے ایم این اے شاہد خٹک کی ملاقات
وزیراعلیٰ محمود خان سے ایم این اے شاہد خٹک کی ملاقات،
کوہاٹ ڈویژن کیلئے گیس کی رائلٹی ، پینے کے صاف پانی کی فراہمی اور دیگر ترقیاتی منصوبوں پر بات چیت
وزیراعلیٰ خیبرپختونخوا محمود خان نے کہا ہے کہ ضلع کرک کیلئے پینے کے صاف پانی کی فراہمی کے دو منصوبوں کو نئے مالی سال کے سالانہ ترقیاتی پروگرام میں شامل کیا جائے گا جبکہ آئل اینڈ گیس کی رائلٹی کی مد میں پہلے مرحلے میں مختلف ترقیاتی منصوبوں کیلئے ضلع کرک کو 1.3 ارب ، ضلع ہنگو کو 1.0 ارب جبکہ ضلع کوہاٹ کو 550 ملین ر وپے مختص کئے جائیں گے ۔ان منصوبوں کی تکمیل سے پورے کوہاٹ ڈویژن میں لوگوں کے بنیادی مسائل حل ہوں گے ۔ ان خیالات کا اظہار انہوںنے کرک سے منتخب ممبر قومی اسمبلی شاہد خٹک سے گفتگو کرتے ہوئے کیا جس نے بدھ کے روز اُنکے دفتر میں اُن سے ملاقات کی اور ضلع کرک سمیت پورے کوہاٹ ڈویژن کے ترقیاتی منصوبوں اور عوامی مسائل کے حل سے متعلق اُمور پر تبادلہ خیال کیا۔ وزیراعلیٰ نے کہا کہ ضلع کرک کے عوام کو پینے کے صاف پانی کی فراہمی کا دیرینہ مسئلہ حل کرنا موجودہ صوبائی حکومت کی ترجیحات میں شامل ہے اور اس مقصد کیلئے ہنگامی بنیادوں پر اقدامات اُٹھائے جارہے ہیں۔ اُنہوںنے کہاکہ ضلع کرک کو گیس کی فراہمی کیلئے موجودہ مالی سال کے دوران 1.10 ارب روپے مختص کئے گئے تھے جبکہ مجموعی طور پر کرک کے عوام کو گیس کی فراہمی کے منصوبے پر 7.5 ارب روپے خرچ کئے جائیں گے ۔ ایم این اے شاہد خٹک نے علاقے کے لوگوں کو درپیش مسائل کے حل اور علاقے کی ترقی میں ذاتی دلچسپی لینے پر وزیراعلیٰ کا شکریہ ادا کیا۔