News Details

11/11/2018

وزیراعظم پاکستان عمران خان سے وزیراعلیٰ خیبرپختونخوا محمود خان نے گزشتہ رات اسلام آباد میں ملاقات کی ۔

وزیراعظم پاکستان عمران خان سے وزیراعلیٰ خیبرپختونخوا محمود خان نے گزشتہ رات اسلام آباد میں ملاقات کی ۔ ملاقات میں صوبے میں جاری حکومتی اقدامات و اصلاحات ، ترقیاتی منصوبوں خصوصاً زیر تعمیر بس ریپیڈ ٹرانزٹ پراجیکٹ پر تبادلہ خیال کیا گیا۔وزیراعلیٰ کے اصرار پر وزیراعظم نے ریپیڈ بس ٹرانزٹ کے ترامیم شدہ ڈیزائن کو آئندہ ایکنک اجلاس میں شامل کرنے کی ہدایت کی ۔ ایکنک کا آئندہ اجلاس 14 نومبرکو متوقع ہے ۔ وزیراعلیٰ نے ملاقات کے بعداپنے خیالات کا اظہار کرتے ہوئے کہاہے کہ بس ریپڈ ٹرانزٹ منصوبے کو ایکنک کے آئندہ اجلاس کے ایجنڈے میں شامل کر دیا گیا ہے ۔ بی آر ٹی کے اضافی فیچرز کی اجلاس میں منظوری لی جائے گی جس سے وسائل کا مسئلہ حل ہو جائے گا اور بی آرٹی کی معیاری ، تیز تر اور دیر پا تعمیر وتکمیل میں مدد حاصل ہو گی ۔ وزیراعلیٰ نے واضح کیا کہ بی آر ٹی پہلے ایکنک کے ایجنڈے میں شامل نہیں تھا تاہم اس اہم منصوبے میں وفاقی حکومت کی دلچسپی کے باعث ایکنک کے آئندہ اجلاس میں شامل کردیا گیا ہے ۔ وزیراعلیٰ نے کہاکہ یہ صوبے کا سب سے بڑا ترقیاتی منصوبہ اور ملک میں اپنی نوعیت کا ایک منفرد منصوبہ ہے ۔ منصوبے کی مجموعی لاگت 66.43 ارب روپے ہے جس میں مین کوریڈور سمیت پشاور کو اوورآل ماسٹر پلان سمجھا جا سکتا ہے جس میں تمام فیچرز بھی شامل ہیں جو ملک میں اس نوعیت کے کسی بھی دوسرے پراجیکٹ میں شامل نہیں ہیں۔ بی آر ٹی کو پشاور کے ایئر پورٹ سمیت مختلف اڈوں اور قریبی علاقوں سے مربوط و منسلک کیا گیا ہے جو پاکستان میں بننے والے اس قسم کے کسی بھی دوسرے منصوبے میں نہیں ہیں۔ اس منصوبے کے سات فیڈر روٹس اور مختلف مقامات پر 32 سٹیشنز ہوں گے، 220 بسیں ہوں گی ، خواتین کیلئے آرام دہ اور محفوظ سہولت یقینی بنائی جائے گی ۔ منصوبے کے تحت تین پارکنگ پلازے اور دیگر کمرشل سرگرمیاں بھی ہوں گی جو اس منصوبے کو دیر پا بنانے میں مدد گار ثابت ہو ں گی اور مسافروں کو بھی سہولت میسر ہو گی ۔ پیدل چلنے والوں کیلئے علیحدہ ٹریک ، سائیکل سٹینڈ و ٹریک ، بائی سائیکل شیئرنگ سسٹم سمیت متعدد ایسے فیچرز ہیں جو بی آر ٹی کو دیگر منصوبوں سے ممتاز و منفرد بناتے ہیں۔ وزیراعلیٰ نے کہاکہ وزیراعظم پاکستان عمران خان نے اس منصوبے میں خصوصی دلچسپی کا اظہار کیا اور اسے ترجیحی بنیادوں پر تیزر فتاری کے ساتھ مکمل کرنے کی ضرورت پر زور دیا جس پر ہم وزیراعظم پاکستان کے مشکور ہیں۔ وزیراعلیٰ نے کہاکہ بی آر ٹی پشاور کے شہریوں کیلئے صوبائی حکومت کا ایک منفرد تحفہ ہے اس منصوبے کی تکمیل سے عوام کے تحفظات دور ہو جائیں گے اور اُنہیں سستی اور بہترین سفری سہولت میسر ہو گی ۔